21-வது உலகக் கோப்பை கால்பந்து போட்டியின் 3-வது இடத்துக்கு நடந்த ஆட்டத்தில் இங்கிலாந்தை 2-0 என்ற கோல் கணக்கில் அபாரமாக வென்றது பெல்ஜியம்!
ரஷ்யாவில் 21-வது ஃபிபா உலகக் கோப்பை கால்பந்து போட்டிகள் நடைபெற்று வருகிறது. இப்போட்டியில், 3-வது இடத்துக்கான ஆட்டம் இன்று செயின்ட் பீட்டர்ஸ்பர்க்கில் நடந்தது. இதில் 2-0 என்ற கோல் கணக்கில் இங்கிலாந்தை வென்று மூன்றாவது இடத்தைப் பிடித்தது பெல்ஜியம்.
1982 மற்றும் 2006 ஆம் ஆண்டுக்கு பிறகு ஐரோப்பாவைச் சேர்ந்த நான்கு அணிகள் அரை இறுதியில் விளையாடின. தொடர்ந்து நான்காவது முறையாக ஐரோப்பிய நாடே கோப்பையை வெல்ல உள்ளது. 2006ல் இத்தாலி, 2010ல் ஸ்பெயின், 2014-ல் ஜெர்மனி கோப்பையை வென்றன.
லீக் சுற்றில் மூன்று ஆட்டங்களிலும் வென்ற மூன்று அணிகளில் ஒன்றாக பெல்ஜியம் உள்ளது. ஜி பிரிவில் பனாமாவை 3-0, துனீஷியாவை 5-2, இங்கிலாந்தை 1-0 என வென்றது. நாக் அவுட் சுற்றில் 3-2 என ஜப்பானை வென்றது. காலிறுதியில் முன்னாள் சாம்பியனான பிரேசிலை 2-1 என வென்றது. அரை இறுதியில் பிரான்ஸிடம் 1-0 என தோல்வியடைந்தது.
உலகக் கோப்பையில் 3வது இடத்தைப் பிடிப்பதற்கான ஆட்டத்தின் 4வது நிமிடத்திலேயே மியூனியர் கோலடிக்க 1-0 என பெல்ஜியம் முன்னிலை பெற்றது. முதல் பாதி இறுதியில் 1-0 என பெல்ஜியம் முன்னிலையை தக்க வைத்தது. 82வது நிமிடத்தில் ஈடன் ஹசார்ட் கோலடிக்க பெல்ஜியம் 2-0 என முன்னிலை பெற்றது.
இறுதியில் 2-0 என்ற கோல் கணக்கில் இங்கிலாந்தை வென்று 3-வது இடத்தைப் பிடித்தது பெல்ஜியம். இந்த உலகக் கோப்பையில் இரண்டாவது முறையாக பெல்ஜியத்திடம் தோல்வியடைந்துள்ளது இங்கிலாந்து. மேலும் இந்த உலகக் கோப்பையில் இங்கிலாந்தின் மிகவும் மோசமான ஆட்டமாகவும் இது அமைந்தது.
