ಲೋಕಸಭಾ ಚುನಾವಣೆ: ಬಿಜೆಪಿಯಿಂದ ಮತ್ತೊಂದು ಪಟ್ಟಿ ರಿಲೀಸ್, ರಮಣ್ ಸಿಂಗ್ ಪುತ್ರನಿಗಿಲ್ಲ ಟಿಕೆಟ್!

ನವದೆಹಲಿ: 2019ರ ಲೋಕಸಭಾ ಚುನಾವಣೆಗಾಗಿ ಬಿಜೆಪಿ 9 ಅಭರ್ತಿಗಳ ಮತ್ತೊಂದು ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ಛತ್ತೀಸ್​ಗಢ, ತೆಲಂಗಾಣ, ಮೇಘಾಲಯ ಮತ್ತು ಮಹಾರಾಷ್ಟ್ರ ಲೋಕಸಭಾ ಚುನಾವಣೆಗೆ ಅಭ್ಯರ್ಥಿಗಳ ಹೆಸರನ್ನು ಘೋಷಿಸಿದೆ.

ಈ ಪಟ್ಟಿಯಲ್ಲಿ ಬಿಜೆಪಿ ಛತ್ತೀಸ್​ಗಢದ 6, ತೆಲಂಗಾಣದ 1, ಮೇಘಾಲಯದ 1 ಮತ್ತು ಮಹಾರಾಷ್ಟ್ರದ 1 ಲೋಕಸಭಾ ಕ್ಷೇತ್ರಗಳಿಗೆ ಅಭ್ಯರ್ಥಿಯನ್ನು ಘೋಷಿಸಿದೆ.

9 ಜನರ ಪಟ್ಟಿಯಲ್ಲಿ ಛತ್ತೀಸ್​ಗಢದ ಆರು ಅಭ್ಯರ್ಥಿಗಳ ಹೆಸರನ್ನು ಘೋಷಿಸಲಾಗಿದೆ. ಛತ್ತೀಸ್​ಗಢದ ರಾಜ್ ನಂದಗಾವ್ ಕ್ಷೇತ್ರದಿಂದ ಸಂತೋಷ್ ಪಾಂಡೆ, ರಾಯ್ಪುರ ದಿಂದ ಸುನಿಲ್ ಸೋನಿ, ಬಿಲಾಸ್ಪುರ್ ದಿಂದ ಅರುಣ್ ಸಾವ್, ದುರ್ಗದಿಂದ ವಿಜಯ್ ಬಗೆಲ್, ಕೊರ್ಬಾದಿಂದ ಜ್ಯೋತಿ ನಂದ ದೂಬೆ ಅವರಿಗೆ ಟಿಕೆಟ್ ನೀಡಲಾಗಿದೆ. ಆದರೆ ಛತ್ತೀಸ್​ಗಢದ ಮಾಜಿ ಮುಖ್ಯಮಂತ್ರಿ ರಮಣ್ ಸಿಂಗ್ ಪುತ್ರನಿಗೆ ಟಿಕೆಟ್ ನೀದಲಾಗಿಲ್ಲ. ರಮಣ್ ಸಿಂಗ್ ಪುತ್ರ ಅಭಿಷೇಕ್ ಸಿಂಗ್ ಅವರು ರಾಜ್ ನಂದಗಾವ್ ಕ್ಷೇತ್ರದ ಮಾಜಿ ಸಂಸದರಾಗಿದ್ದಾರೆ.

ಛತ್ತೀಸ್​ಗಢದ ಹಾಲಿ ಸಂಸದರಿಗೆ ಈ ಬಾರಿ ಟಿಕೆಟ್ ನೀಡಲಾಗುವುದಿಲ್ಲ ಎಂದು ಬಿಜೆಪಿ ಪಟ್ಟಿ ಬಿಡುಗಡೆಗೂ ಮೊದಲೇ ಸ್ಪಷ್ಟಪಡಿಸಿತ್ತು. ಆದರೆ ಸತತ 15 ವರ್ಷ ಛತ್ತೀಸ್​ಗಢದ ಮುಖ್ಯಮಂತ್ರಿಯಾಗಿದ್ದ ಬಿಜೆಪಿಯ ರಮಣ್ ಸಿಂಗ್ ಅವರ ಪುತ್ರನಿಗೆ ಬಿಜೆಪಿ ಟಿಕೆಟ್ ನೀಡಲಿದೆ ಎಂದು ನಂಬಲಾಗಿತ್ತು. ಅದಾಗ್ಯೂ ರಮಣ್ ಸಿಂಗ್ ಪುತ್ರನಿಗೆ ಟಿಕೆಟ್ ದೊರೆಯದೇ ಇರುವುದು ಅವರಿಗೆ ಬಾರಿ ಹಿನ್ನಡೆಯಾದಂತಾಗಿದೆ.