Amarnath Yatra 2024: ସାମ୍ନାକୁ ଆସିଲା ବାବା ଅମରନାଥଙ୍କ ଚଳିତ ବର୍ଷର ପ୍ରଥମ ଫଟୋ

Amarnath Yatra 2024: ଦେଶର ବିଭିନ୍ନ ସ୍ଥାନରୁ ଲକ୍ଷ ଲକ୍ଷ ଭକ୍ତ ଅମରନାଥରେ ପହଞ୍ଚି ଶିବଲିଙ୍ଗ ପୂଜା କରିଥାନ୍ତି । ଏଥର ଯାତ୍ରା ୨୯ ଜୁନ୍ ରୁ ଆରମ୍ଭ ହେବାକୁ ଥିବାବେଳେ ଏହିଯାତ୍ରା ପ୍ରାୟ ୫୨ ଦିନ ପର୍ଯ୍ୟନ୍ତ ଚାଲିବ । ୨୯ ଅଗଷ୍ଟ ଦିନ ଅମରନାଥଯାତ୍ରା ଶେଷ ହେବ । ତେବେ ଏହି ଯାତ୍ରା ପାଇଁ ଏପ୍ରିଲ ୧୫ରୁ ଶ୍ରଦ୍ଧାଳୁମାନେ ପଞ୍ଜୀକରଣ କରିଛନ୍ତି । ଆବଶ୍ୟକ ଚିକିତ୍ସା ପ୍ରମାଣପତ୍ର ପାଇବା ପ୍ରକ୍ରିୟା ବର୍ତ୍ତମାନ ଚାଲିଛି । ୧୩ ରୁ ଆରମ୍ଭ କରି ୭୦ ବର୍ଷ ବୟସ୍କ ଭାରତୀୟମାନେ ଅମରନାଥ ଯାତ୍ରାରେ ସାମିଲ ହୋଇପାରିବେ ।

ଅମରନାଥ ଯାତ୍ରା ପାଇଁ ଏପ୍ରିଲ ୧୫ରୁ ଉଭୟ ଅନଲାଇନ୍ ଏବଂ ଅଫଲାଇନରେ ପଞ୍ଜୀକରଣ ଆରମ୍ଭ ହୋଇସାରିଛି । ଅନଲାଇନ୍ ପଞ୍ଜୀକରଣ ପାଇଁ, ଆପଣ ଶ୍ରୀ ଅମରନାଥ ବୋର୍ଡର ଅଫିସିଆଲ୍ ୱେବସାଇଟ୍ ରେ ଲଗ୍ ଇନ୍ କରିପାରିବେ । ଯଦି ଆପଣ ମୋବାଇଲ୍ ଆପ୍ଲିକେସନ୍ ମାଧ୍ୟମରେ ପଞ୍ଜିକରଣ କରିବାକୁ ଚାହୁଁଛନ୍ତି ତେବେ ଆପଣଙ୍କୁ ଶ୍ରୀ ଅମରନାଥଜୀ ଯାତ୍ରା ଆପ୍ ଡାଉନଲୋଡ୍ କରିବାକୁ ପଡିବ । କେବଳ ସେତିକି ନୁହେଁ ଆପଣ ଚାହିଁଲେ, ପଞ୍ଜାବ ନ୍ୟାସନାଲ ବ୍ୟାଙ୍କ, ଏସବିଆଇ, ୟେସ୍ ବ୍ୟାଙ୍କ ଏବଂ ଜାମ୍ମୁ କାଶ୍ମୀର ବ୍ୟାଙ୍କରୁ ଅଫଲାଇନରେ ପଞ୍ଜୀକରଣ କରିପାରିବେ ।

ଯାତ୍ରା ପାଇଁ ଦୁଇଟି ମାର୍ଗ

୧. ପହଲଗାମ ମାର୍ଗ: ଏହି ମାର୍ଗ ଦେଇ ବାବା ଅମରନାଥଙ୍କ ଗୁମ୍ଫାରେ ପହଞ୍ଚିବାକୁ ୩ ଦିନ ସମୟ ଲାଗିଥାଏ । କିନ୍ତୁ ଏହି ମାର୍ଗଟି ଅତ୍ୟନ୍ତ ସହଜ ଅଟେ । ଯାତ୍ରାରେ କୌଣସି ଖାଲ ନଥିବା କାରଣରୁ ଯିବାରେ ସମସ୍ୟା ହୁଏନାହିଁ  ।  ପହଲଗାମରୁ ପ୍ରଥମ ଷ୍ଟପ୍ ହେଉଛି ଚନ୍ଦନୱାଡି । ଏହା ବେସ୍ କ୍ୟାମ୍ପ ଠାରୁ ୧୬ କିଲୋମିଟର ଦୂରରେ ଅବସ୍ଥିତ । ଏଠାରୁ ଯାତ୍ରୀମାନେ ଯାତ୍ରା ଆରମ୍ଭ କରିଥାନ୍ତି । ତିନି କିଲୋମିଟର ଅତିକ୍ରମ କରିବା ପରେ ଯାତ୍ରା ପିସୁ ଟପ୍ ରେ ପହଞ୍ଚେ । ଏଠାରୁ ପାଦରେ ଯାତ୍ରା କରିବା ପରେ ସନ୍ଧ୍ୟା ସମୟରେ ଶେଶନାଗରେ ପହଞ୍ଚନ୍ତି ଯାତ୍ରୀ । ଏହି ଯାତ୍ରା ପ୍ରାୟ ୯ କିଲୋମିଟର । ପରଦିନ ଯାତ୍ରୀମାନେ ଶେଶନାଗରୁ ପଞ୍ଚତରଣୀକୁ ଯାଆନ୍ତି । ଏହା ଶେଶନାଗଠାରୁ ପ୍ରାୟ ୧୪ କିଲୋମିଟର ଦୂରରେ ଅବସ୍ଥିତ । ଅମରନାଥ ଗୁମ୍ଫା ପଞ୍ଚତରଣୀଠାରୁ ମାତ୍ର ୬ କିଲୋମିଟର ଦୂରରେ ଅବସ୍ଥିତ ।

୨. ବାଲ୍ଟାଲ୍ ମାର୍ଗ: ଯଦି ଆପଣଙ୍କ ପାଖରେ ସମୟ କମ ତେବେ ଆପଣ ବାବା ଅମରନାଥ ଦର୍ଶନ ପାଇଁ ବାଲ୍ଟାଲ୍ ମାର୍ଗ ରାସ୍ତାରେ ଯାଇପାରିବେ । ଏହା ରାସ୍ତା ମାତ୍ର ୧୪ କିମି ପାଦଚଲା ରାସ୍ତା । କିନ୍ତୁ ରାସ୍ତାର ଅବସ୍ଥା ଏତେ ଭଲ ନଥିବା କାରଣରୁ ବୟସ୍କଙ୍କ ପାଇଁ ଏହି ରାସ୍ତା ବିପଜ୍ଜନକ ହୋଇଥାଏ । ଅନେକ ଯାତ୍ରୀ ଏହି ମାର୍ଗରେ ଅସୁବିଧାର ସମ୍ମୁଖୀନ ହୋଇଥାନ୍ତି । ଏହି ମାର୍ଗଟିରେ ସଂକୀର୍ଣ୍ଣ ରାସ୍ତା ସହ ବିପଜ୍ଜନକ ମୋଡ଼ ରହିଛି ।

ଗତଥର ଅମରନାଥ ଯାତ୍ରାକୁ ପ୍ରାୟ ୪.୫୦ ଲକ୍ଷ ଭକ୍ତ ଆସିଥିଲେ। ତେବେ ଏଥର କିନ୍ତୁ ୬ ଲକ୍ଷ ଯାତ୍ରୀଙ୍କ ଆସିବାର ସମ୍ଭାବନା ରହିଛି ବୋଲି ଆଶା କରାଯାଉଛି । ଯାତ୍ରା ସମୟର ଅଧିକ ଭିଡ଼କୁ ଦୃଷ୍ଟିରେ ରଖି ବ୍ୟାପକ ବ୍ୟବସ୍ଥା କରାଯାଇଛି । ସମଗ୍ର ମାର୍ଗରେ କ୍ୟାଟରିଂ, ବିଶ୍ରାମ ସ୍ଥାନ ଏବଂ ସ୍ୱାସ୍ଥ୍ୟ ଯାଞ୍ଚ ପାଇଁ ବ୍ୟବସ୍ଥା କରାଯିବ । ଏଥିସହ ଅକ୍ସିଜେନ୍ ବୁଥ, ଆଇସିୟୁ ବେଡ୍, ଏକ୍ସ-ରେ, ସୋନୋଗ୍ରାଫି ମେସିନ୍ ଏବଂ ତରଳ ଅମ୍ଳଜାନ ପ୍ଲାଣ୍ଟ ସହିତ ସଜ୍ଜିତ ଦୁଇଟି କ୍ୟାମ୍ପ ହସ୍ପିଟାଲ ପାଇଁ ପ୍ରସ୍ତୁତି ଚାଲିଛି। ଅନ୍ୟପଟେ ପୂର୍ବରୁ ପହଲଗାମରୁ ଗୁମ୍ଫା ପର୍ଯ୍ୟନ୍ତ ୪୬ କିଲୋମିଟର ଲମ୍ବ ୩ ରୁ ୪ ଫୁଟ ଚଉଡା ଏବଂ ବାଲ୍ଟାଲ ମାର୍ଗ ୨ ଫୁଟ ଚଉଡା ଥିଲା । ବର୍ତ୍ତମାନ ଏହାକୁ ପ୍ରଶସ୍ତ କରାଯାଇ ୧୪ ଫୁଟ କରାଯାଇଛି । ସୂଚନା ଅନୁଯାୟୀ, ବାଲ୍ଟାଲରୁ ଗୁଫା ପର୍ଯ୍ୟନ୍ତ ୧୪ କିଲୋମିଟର ରାସ୍ତା ୭ ରୁ ୧୨ ଫୁଟ ପର୍ଯ୍ୟନ୍ତ ପ୍ରଶସ୍ତ ହୋଇଥିବା ଜଣାପଡିଛି । ଏଥିସହ ଯାତ୍ରୀଙ୍କ ପାଇଁ ହେଲିକପ୍ଟର ସେବା ମଧ୍ୟ ଉପଲବ୍ଧ ରହିଛି ।

ସୀମା ରୋଡ୍ ଅର୍ଗାନାଇଜେସନ୍ (BRO) ୨୦୨୩ ନଭେମ୍ବର ୬ ରେ ଅମରନାଥ ଗୁମ୍ଫା ନିକଟକୁ ଯାନବାହନ ଚଳାଚଳ କରାଇଥିଲା । BRO ର ଟ୍ୱିଟର ହ୍ୟାଣ୍ଡେଲରେ ଏହାର ଏକ ଭିଡିଓ ମଧ୍ୟ ସେୟାର କରାଯାଇଥିଲା । 

କେଉଁ ଜିନିଷଗୁଡିକ ନେବା ଉଚିତ
ଯାତ୍ରା ସମୟରେ ଶ୍ରଦ୍ଧାଳୁମାନେ ମେଡିକାଲ୍ ସାର୍ଟିଫିକେଟ୍, ୪ଟି ପାସପୋର୍ଟ ସାଇଜ୍ ଫଟୋଗ୍ରାଫ୍, ଆଧାର କାର୍ଡ, RFID କାର୍ଡ, ଯାତ୍ରା ଆବେଦନ ଫର୍ମ ନିଜ ପାଖରେ ରଖନ୍ତୁ । ଶାରୀରିକ ସୁସ୍ଥତା ଦୃଷ୍ଟିରୁ ପ୍ରତିଦିନ ୪ ରୁ ୫ କିଲୋମିଟର ଚାଲିବା ଅଭ୍ୟାସ କରନ୍ତୁ । ପ୍ରାଣାୟାମ ଏବଂ ବ୍ୟାୟାମ ପରି ଯୋଗ ମଧ୍ୟ କରିବା ଆବଶ୍ୟକ । ଯାତ୍ରା ସମୟରେ ଆପଣଙ୍କ ଉପଯୁକ୍ତ ପୋଷାକ, ରେନକୋଟ୍, ଟ୍ରାକିଂ ବାଡି, ପାଣି ବୋତଲ ଏବଂ ଅତ୍ୟାବଶ୍ୟକ ଔଷଧ ରଖନ୍ତୁ । 

ଏଥର ଦକ୍ଷିଣ କାଶ୍ମୀରରେ ପ୍ରବଳ ତୁଷାରପାତ ହୋଇଥିଲା । ଯେଉଁଥିପାଇଁ ଅମରନାଥ ଗୁମ୍ଫା ଅଞ୍ଚଳରେ ୧୦ ଫୁଟରୁ ଅଧିକ ବରଫ ରହିଛି । ପହଲଗାମ ଏବଂ ବାଲ୍ଟାଲରୁ ଗୁମ୍ଫା ପର୍ଯ୍ୟନ୍ତ ଯାତ୍ରାର ଉଭୟ ମାର୍ଗ ୨ ରୁ ୧୦ ଫୁଟ ପର୍ଯ୍ୟନ୍ତ ବରଫରେ ପୋତି ହୋଇରହିଛି । ତେଣୁ ଜୁନ୍ ପର୍ଯ୍ୟନ୍ତ ଏହାର ତରଳିବାର ସମ୍ଭାବନା କମ୍  । ଏଭଳି ପରିସ୍ଥିତିରେ ସେନା ଯବାନମାନେ ଯାତ୍ରା ମାର୍ଗ ପ୍ରସ୍ତୁତ କରୁଛନ୍ତି । ପ୍ରଥମ ଥର ପାଇଁ ଉଭୟ ମାର୍ଗରେ 5G ଫାଇବର ନେଟୱାର୍କ ରହିବ । ବରଫ ତରଳିବା ମାତ୍ରେ ୧୦ଟି ସ୍ଥାନରେ ମୋବାଇଲ୍ ଟାୱାର ସ୍ଥାପନ କରାଯିବ । ୨୪ ଘଣ୍ଟା ବିଦ୍ୟୁତ୍ ସେବା ଉପଲବ୍ଧ କରାଇବା ପାଇଁ ଅନେକ ସ୍ଥାନରେ ଖୁଣ୍ଟ ପକାଯାଇଛି ।

Also Read- Guru Shukra Yuti: ବୃଷ ରାଶିରେ ଶୁକ୍ର ଏବଂ ବୃହସ୍ପତିଙ୍କ ମିଳନ, ୩ରାଶିକୁ ଧନ ଲାଭ

Also Read- Mercury Transit Impact: ମେଷ ରାଶିରେ ବୁଧ ଚଳନ, ପକାଇବ କି ପ୍ରଭାବ ? ଜାଣନ୍ତୁ